Xayirli tong, Guest!
Soat: 08:24
LoginA'zo bo'lish
Qaynonasi va rafiqasini pichoqlagan yigitga hukm o'qildi

 5 APREL, 13:50 96

.

Cudlanuvchi Ixtiyor Sobirov (ism-familiyalar o'zgartirilgan) turmush o'rtog'i Xolida Murodova uni tashlab ketib, farzandini bermagani, qaynonasi Sanobar Murodova esa qo'pol munosabatda bo'lgani sababli, o'ch olish maqsadida  ularni shafqatsizlarcha pichoqlaydi. Oqibatda olgan tan jarohati tufayli har ikki ayol olamdan o'tadi...

“Rafiqamning xulqi yomon edi...”

Sudlanuvchi Ixtiyor Sobirov sud majlisida aybiga qisman iqror bo'lib, quyidagicha ko'rsatma berdi:

– Turmush o'rtog'im Xolida Murodova bilan 2014 yilda tanishib, uni yaxshi ko'rib qolganman. O'shanda u xolasining uyida yashardi. Oilasidagilar bilan munosabati yaxshi bo'lmagani uchun turli joylarda yashab yurardi. Odamlar uni xulqi yomon qiz, deb ta'riflashlariga qaramay, yoqtirib qolganim uchun uylanmoqchi bo'ldim. Ammo onam bizning turmush qurishimizga qarshilik qildi. Biz esa shar'iy nikoh o'qitib, yashirincha yashab yurdik. 2018 yil fevral oyida Xolidaning homiladorligi ma'lum bo'ldi. Bu haqda onamga aytdim, u “homilador ayol uysiz sarson bo'lmasin”, deb to'y qilishga rozi bo'ldi. 2018 yil 8 may kuni to'y bo'ldi, 2018 yilning 24 oktyabr kuni qizim Husnora dunyoga keldi. Avvaliga yaxshi yashadik, ammo keyinchalik Xolidaning onasi turmushimizga aralasha boshlagach, er-xotin tez-tez urushib qoladigan bo'ldik. Xotinim singlim va onamni hurmat qilmay qo'ydi. Oxirgi paytlarda hech kimdan so'ramay, qizimni ko'tarib ketib qoladigan odat chiqardi. Oxirgi marotaba ketib qolganida orqasidan borsam qizimning rangi-ro'yi bir ahvolda ekan. Uyga kelib, bu haqda onamga aytgandim, u xolam bilan borib, rafiqam va qizimni olib kelishini aytdi. Onamga bormang, deganimga qaramay, uydan chiqib ketdi. Oradan 5-10 daqiqa o'tgach, ko'chadan onam bilan qaynonamning baqirgan ovozi eshitildi. Jahl bilan oshxona pichog'ini olib, ko'chaga chiqdim. Ko'chada qaynonam bilan onam gaplashayotgan,5-6 metr uzoqlikda rafiqam qizimni ko'targancha ketayotgan ekan. Uning orqasidan etib olib, bir necha marotaba pichoq urdim. Buni ko'rib, qaynonam yugurib kelib, menga tashlandi. U meni xaqorat qilgani alam qilib, unga ham bir necha marotaba pichoq urdim. Onam meni to'xtatish maqsadida oyog'imdan mahkam ushlab oldi. Jahl ustida necha marotaba pichoq urganim esimda yo'q. Keyin o'zimni ixtiyoriy ravishda ichki ishlar xodimlariga topshirdim. Hozirda qilmishimdan pushaymonman...

“Hammasiga onasiga aybdor...”

Sud majlisida roziligi asosida guvoh tariqasida so'roq qilingan Dilobar Sobirova quyidagilarni ma'lum qildi:

– Sudlanuvchi Ixtiyor Sobirov o'g'lim bo'ladi. U Xolida Murodovani sevib qolib uylanmoqchi bo'lganida haqiqatan ham qarshilik qilganman, chunki hech kimdan u haqda yaxshi gap eshitmadim.Ammo o'g'lim “Xolidaning hech kimi, yashash joyi yo'qligini, uni nikohiga olsa savob bo'lishini aytib, oyoq tirab turib oldi. Keyinchalik uning homiladorligini eshitib, to'yga rozi bo'ldim. Quda tarafdan hech kim to'yga kelmadi.To onasi paydo bo'lguncha hammasi yaxshi edi. U kelgandan keyin gap-so'z ko'paydi. Hammasiga onasi aybdor...

“Kuyov tuhmat qilyapti...”

Sud majlisida so'roq qilingan jabrlanuvchining qonuniy vakili X.Xudoyberdieva quyidagilarni bayon qildi:

– Marhumalarning biri qizim, ikkinchisi nabiram bo'ladi. Kuyov tuhmat qilyapti. Nabiramning xulqi yomon bo'lmagan, qizim ham u aytgan darajada urushqoq ayol emasdi, hammasi tuhmat. Bu sovuq xabarni eshitib, qizimning uyiga kelganimda, ular olamdan o'tgandi. Ixtiyor Sobirov qizim va nabiramni qasddan o'ldirgani uchun unga eng og'ir jazo berilishini so'rayman.

Jinoyatchiga jazo tayinlandi

Sobirov Ixtiyor JKning 97-moddasi 2-qismi “a, j” bandlarida nazarda tutilgan jinoyatni sodir etganlikda aybli, deb topilib, unga nisbatan 21 yil ozodlikdan mahrum qilish jazosi tayinlandi.

Elbekjon Turg'unboev, Toshkent shahar sudining jinoyat ishlari bo'yicha sudyasi, 

Lola Shoimova, jurnalist.

Manba: darakchi.uz

Manba: aniq.uz

Yangiliklarni Telegramda o'qing!
Saytimizga a'zo bo'ling va yangilikga Izoh qoldiring!
!
telegram
© CHIROYLI.COM, 2012-2021™