LOGOTIPE
Xayirli tun, Mehmon!
Soat: 01:17
Kirish A'zo bo'lish
REKLAMA
Quvvat beruvchi ichimliklarni sotish - nazoratda, o'simliklar karantinini buzganlik uchun jarimalar
MUHARRIR: wapusta

12 NOYABR, 20:05 / KO'RILDI: 6

Oliy Majlis Qonunchilik palatasining navbatdagi majlisida deputatlar 5 ta qonun loyihasini muhokama qildilar, deb yozmoqda Norma.   1. «Urug'chilik to'g'risida»gi Qonun loyihasi ko'rib chiqildi. Hujjat sifatli va hosildor mahsulotlar urug'larini etishtirish ishlarini kengaytirish, ularni xalqaro bozorlarda ilgari surishga qaratilgan.  Shuningdek, qonun loyihasi urug'chilik sohasidagi munosabatlarni tartibga solish mexanizmini takomillashtirish, urug'lik eksporti uchun qulay shart-sharoitlar yaratishni ham ko'zda tutadi.   2. «O'zbekiston Respublikasining Konsullik ustaviga o'zgartish va qo'shimchalar kiritish to'g'risida»gi qonun loyihasi muhokama qilindi. Hozirda amal qilib turgan hujjat  22 yil muqaddam 1996 yil 29 avgustdagi 261-I-son qonun bilan tasdiqlangan. O'tgan davr mobaynida milliy qonunchilikka kiritilgan o'zgartirishlar, shuningdek, hozirgi kunda shakllangan amaliyot, xorijiy tajriba va xalqaro huquq normalarini inobatga olgan holda, davrning o'zi mazkur hujjat takomillashtirilishini taqozo etmoqda. Shu munosabat bilan parlament quyi palatasi tomonidan Konsullik ustavi yangi tahrirda tayyorlandi.   3. «O'zbekiston Respublikasining ayrim qonun hujjatlariga qo'shimcha va o'zgartishlar kiritish to'g'risida»gi Qonun loyihasi ham deputatlar diqqat markazida bo'ldi. Oziq-ovqat xavfsizligi bo'yicha Evropa agentligi (EFSA) tahlillariga ko'ra, 18-29 yoshda bo'lgan yigit va qizlarning 70%i energetik ichimliklarni alkogol mahsulotiga qo'shib ichishi ma'lum bo'ldi. Mutaxassislarning ta'kidlashicha, bu ichkilikbozlik alkogolning o'zidan zaharlanishdan ko'ra ancha xavfliroq. Deputatlarning fikricha, taklif qilinayotgan qonun loyihasining qabul qilinishi amaldagi qonun hujjatlaridagi mavjud bo'shliqni to'ldirish bilan birga, quvvat beruvchi ichimliklarni reklama va realizatsiya qilish ishlari ustidan samarali nazorat o'rnatish mexanizmlarini qo'llashga ko'maklashadi.    4. “Jamoatchilik nazorati to'g'risida”gi Qonunni amalga oshirish bo'yicha chora-tadbirlar rejasi ijrosi yuzasidan “O'zbekiston Respublikasining ayrim qonun hujjatlariga o'zgartishlar va qo'shimcha kiritish to'g'risida”gi Qonuni loyihasi ko'rib chiqildi. Deputatlar fikriga ko'ra, tahlillar “Davlat tasarrufidan chiqarish va xususiylashtirish to'g'risida”gi, “Oziq-ovqat mahsulotining sifati va xavfsizligi to'g'risida”gi, “Radiatsiyaviy xavfsizlik to'g'risida”gi, “Psixiatriya yordami to'g'risida”gi hamda “O'rmon to'g'risida”gi qonunlarning normalari jamoatchilik nazorati sub'ektlari doirasini cheklab qo'yayotganini ko'rsatmoqda. Ko'rilayotgan loyiha bilan qonun hujjatlari normalari o'rtasidagi nomuvofiqlikni bartaraf etish maqsadida yuqorida keltirilgan qonunlarga tegishli o'zgartirishlar kiritish taklif etilmoqda.   5. Deputatlar «O'zbekiston Respublikasi Ma'muriy javobgarlik to'g'risidagi kodeksga o'zgartish va qo'shimchalar kiritish to'g'risida»gi Qonun loyihasini muhokama qildilar. U Prezidentning 28.03.2018 yildagi PQ-3626-son qarorining 17-bandiga asosan ishlab chiqilgan. MJTKning 107-moddasiga o'zgartirishlar kiritish taklif qilinmoqda. Karantin e'lon qilingan zararkunandalarga, o'simliklar kasalliklariga va begona o'tlarga qarshi kurashning sanitariya qoidalarini va boshqa xil qoidalarni buzish jarima – fuqarolarga EKIHning 1 baravaridan 3 baravarigacha, mansabdor shaxslarga esa, EKIHning 3 baravaridan 5 baravarigacha miqdorda oshiriladi.  Chet mamlakatlardan keltirilib, karantin tekshiruvidan va tegishli ishlov berishdan o'tkazilmagan materiallarni tashib chiqib ketish  uchun sanktsiyani (MJTKning 108-moddasi) – fuqarolarga EKIHning 2 baravaridan 5 baravarigacha, mansabdor shaxslarga esa, EKIHning 5 baravaridan 10 baravarigacha miqdorda oshirish taklif qilinayotir. Shuningdek, huquqbuzarlik ma'muriy jazo chorasi qo'llanilganidan keyin bir yil davomida takror sodir etilsa, huquqbuzarlik ashyolarini musodara qilib, fuqarolarga EKIHning 5 baravaridan 7 baravarigacha, mansabdor shaxslarga esa, EKIHning 7 baravaridan 15 baravarigacha miqdorda jarima solish bo'yicha qo'shimcha kiritish nazarda tutilmoqda.

Manba: kun.uz

Ulashish
Fikrlar
Saytimizga a'zo bo'ling va yangilikga Izoh qoldiring!
Hali hech kim izoh qoldirmagan!!