Xayirli tun, Guest!
Soat: 01:10
Tavsiya qilamiz
MILLION JAMOASI KONSERT 2021
LoginA'zo bo'lish
Ta'ziya! O'zbekiston Qahramoni 82 yoshida vafot etdi

 24 APREL, 10:05 90

.

O'zbekiston Qahramoni, Oliy Majlis Senati a'zosi, ibratli ustoz, fidoyi inson Hasan Norbekovich Normurodov 82 yoshida vafot etdi. 

Butun umrini ma'rifatga, elga xizmatga bag'ishlagan, halol mehnati, aqlu zakovati bilan xalq o'rtasida katta obro' qozongan bu inson hayoti mamlakatdagi barcha ziyolilar uchun chinakam ibrat maktabi edi. 

Kattaqo'rg'on tumanidagi ma'rifatparvar oilada tug'ilib o'sgan H.Normurodov ota-onadan olgan yaxshi tarbiya va ilmga bo'lgan ishtiyoqi tufayli o'rta maktab va pedagogika texnikumida a'lo baholarga o'qidi. Tashkilotchiligi va odobi bilan ko'zga tashlandi. Maktabda ozroq ishlagach,  harbiy xizmatni o'tab, Samarqand davlat universiteti filologiya fakultetida tahsil oldi. 

Shundan keyin fidoyi, intiluvchan muallimning hayoti ta'lim-tarbiya bilan bog'landi. Dastlab qishloq maktabida til va adabiyot fani o'qituvchisi, keyinchalik yoshlar etakchisi bo'lib ishladi. Bir muddat tuman yoshlar qo'mitasini boshqardi.

H.Normurodovdagi g'ayrat va tajribaga ishonch bildirib, uni partiya ishiga o'tkazishdi. Bu sohada ham Hasan Norbekovich tezda nazarga tushdi. Viloyat partiya qo'mitasida bo'lim mudiri bo'ldi. Jomboy tumanida ikkinchi, viloyat partiya qo'mitasida uchinchi kotib va Narpay tumanida birinchi rahbar sifatida faoliyat ko'rsatdi.

H.Normurodov shundan so'ng viloyat xalq ta'limi boshqarmasiga, fan va ta'lim xodimlari kasaba uyushmalari kengashiga rahbarlik qildi. Qariyb o'n yil davomida "Nuroniy" jamg'armasi viloyat bo'limini boshqardi. Samarali faoliyati evaziga "Mehnat shuhrati", "El-yurt hurmati" ordenlariga sazovor bo'ldi. Va nihoyat 2019 yilda Hasan Norbekovichga mamlakatdagi islohotlardagi samarali xizmati uchun O'zbekiston Qahramoni unvoni berildi.   Hasan Norbekovich butun umri davomida mehnatsevarligi, halolligi, el ishiga kamarbastaligi tufayli jamoatchilikka ibrat bo'lib yashadi. Yuzlab shogirdlar tayyorladi. Davlat rahbarining nazariga tushdi. Xalq o'rtasida obro' topdi. Safdoshlarini, yoshlarni doimo mamlakatdagi buyuk o'zgarishlar jarayonida faol ishtirok etishga chorladi, bu borada o'zi namuna bo'ldi. Xalqning chinakam oqsoqoliga aylandi.   H.Normurodov Samarqand jamoatchiligining faxri edi. Shu sababli ham bu fidoyi insonning tabarruk nomi uni bilgan, u bilan ishlagan barcha yurtdoshlarimiz qalbida uzoq vaqt saqlanib qolajak.

Manba: aniq.uz

Yangiliklarni Telegramda o'qing!
Saytimizga a'zo bo'ling va yangilikga Izoh qoldiring!
!
telegram
© CHIROYLI.COM, 2012-2021™